USA Mizo awmte min hmuh chak thu pawh a rawn sawi tel a, chumi avangte leh thenrual thate pawh hmuh an chakawm alawm tih thuah a rawn thlen hma deuh tur thu pawh a rawn sawi tel a. Pu Lalzawmpuia Zadengte inah thleng turin ka’n ruahman sak ve tawp a, anni chhung hi ka chhungte ber leh ka thiantha ngawih ngawihte an nih avangin phur takin min lo thlensak an inhuam thu min hrilh a, ka lawm ngei mai.
Pu Sanga US rawn kal chhan tak hi America President hovin White House-ah ni 5.2.2009 at 7:30 am National Prayer Breakfast an eiho dawn a ni a. Hei bakah hian Khawvel ramdang hruaitute nen Chhunchaw eihona te leh thildang dang tih ho tur an nei bawk a ni.
Tichuan Pu Sanga alo kal dawn tih a chian takah chuan kan Mizo unau mai pawh ni lo, hnamdangho pawh chuan hmuh an chak hlawm em avangte leh an zingah thusawi thei ngei se an tih hlawm avangin, hun tlem tal min neih pui rawh se tih an beisei thu an rawn sawi tak mawlh mawlh hlawmah chuan, Pu Sanga chuan a kal kual dan tur vel zawng zawng kan kutah a dah a. Liz-i’n theih patawpin a buaipui a, ani zarah a tlawh tur hote kan han ti fel leh duak a, alawmawm leh khawp mai. Kan Mizo Hruaitute pawh an felin puih kan ngaihna laiah chuan min puih an hreh lo hle bawk.
Nimin ni 02.02.09 khan zinglam dar 11:21 ah Reagan Airport-ah, kei leh Pu Zawma leh Liz, Puia nen kan va hmuak thleng ve ta anih chu. Kum rei tak kan inhmuh tawh loh avangin kan han inhmu chu kan hlim tlang hle. Mahse vanduai thlak takin, a hritlang nat deuh avangin a aw a chhang vek a, thusawina tur kan lo buatsaih sak hnem sia kan mangang ang reng hle a. Theihtawpin Lizi’n a damdawi tha tinreng leh tawngtaina nen a enkawl chuan tlem chuan vawiin lam chuan a zia deuhin ta in ka hria. Nimin tlai lam la la chuan President in a thlentirna tur hmun Hilton hotel-te kan zuk fang hova, tin, chakai a eichak thu a sawi bawk a, tlai chaw atan chakai kan ei a, nakinah a phal chuan a chakai ei lai thlalak ka la rawn post sak ang nge.
Nizan lamahte Mizo Society of America OB chinin kim takin a thlenna inah an rawn lawm a, vawiin tlai khan chaw eipuinate an nei a, zan lamah Hilton hotela riak turin an zuk thlah thla nghal bawk a ni. Zing lamah ama mimal thiante ti mai ila, chungte nen chuan chhunchaw eihona an nei bawk.
Naktuk hian Seventh Day lam hotu lian President Jan Paulsen a hmu anga. Chhunchaw Hilton Hotel-ah eiin an official function hi tan a ni dawn a. Ni 02.06 thleng he hotel-ah hian a awm anga. Ni 6 zanah Mizo Christian Fellowship inkhawmna Sligo-ah thu asawi ang. Tin, Mizo Society of America hian ama pualin inkawm khawm chawlhni zan-ah Sligo-ah tho an buatsawi ve leh dawn bawk a. Ni 09 ah LA lamah midang tlawh tur aneih avangin min kal san phawt anga, tichuan, chumi hunah a fanu Becki-te hnen lam Boston-ah a chho leh anga, India ram a haw hun tur hi chiang takin ala ruahman lo a ni. Heng ka rawn sawi bak hun awl kar lakah hian hmun hrang hrangah thusawina tur hun a nei dawn bawk a ni. A programme hi a khat ang reng hle a, amah a hritlang bawk si a, tha taka a hunte a hman theih nan min lo tawngtai pui bawk dawn nia. Phur dan a zirin report dang pawh ka la rawn pe leh zel ang nge.