YMA CHANGREL A SUAL TA FO MAI

By H.C. Vanlalruata

Tunhnaia thilthleng langsar tak tak, YMA inhnamhnawihna hian mi tam tak rilru a tibuai a. YMA chang rel a sual thei lo nia ngai tam takin an thinlung chhungrilah rinhlelhna an nei nasa hle tawh a. Mahse, YMA-a chiah zawr, Mizo leh YMA thliar hrang thei lo tam tak chuan an rinhlelhna chu an mangchhia emaw an ti mek a. Thudik hmu-a hre chungin pawm harsa an ti em em a. Chu thil chu Burma ram aṭanga lokal kan Mizo pui ngeite chunga Central YMA chet dan leh Mizorama piang seilian ngei Mizo dik tak ni bawk site laka an thu vuakthlak duhdan hi a ni.

Kan Central YMA hruaitute hian Mizo Hnam hi an hmangaih ngeiin ka ring a. Mizo Hnam inpumkhatna duhtu an nih hi ka la ringhlel chhin lo hrim hrim a, tunah pawh rinhlelhna chhete pawh ka nei lo. Khawvel hmun hrang hranga khawsa Mizote pawh hi Mizo dik takah an pawm ka ring a. 'Ramin ri a nei a, hnamin ri a nei lo' tih pawh hi a taka ngaihtuah chiang chiah lem lo hian an pawm thovin ka ring. 'Hnam bil' tih ṭawngkam an hman chhen pawh hi Mizo inpumkhat an duhna a ni ang. Mahse, an ngaihdan tihhlawhtlin an tum mek dan erawh hi chu dik lo leh ṭha lo tak a ni.

Mahni insawi lut ta i la. Shillong-a College kan kal ve lai chuan kei, Hmar hnam (Hmar ṭawng kawi khat chu sawi loh thumal pakhat pawh hre lo) hi min sawm ve ngial pawhin Hmar zirlai pawl-ah ka tel duh ngai lo. Ka ṭhianpa H (Hnialum) Vanmawia, khatihlaia Mizo Students Union, Shillong President ni mek pawh Pawih/Lai zirlai pawlah a tel duh hek lo. Mizoram pawna hawpui pakhata lehkha zira kalkhawm Mizo tlemte zinga "Kei Paula pawl, kei Apollova pawl, kei Kipha pawl, kei Krista pawl ka ni," tih kha kan duh lo a ni. Chu chu kan ṭhian dun pawm dan (conviction) a ni a, kan chhuang khawp mai. Keini ṭhian dun chu chiang hle mah ila midang barhluih (impose) erawh chu thu dang daih a ni.

Chu chu a ni ka sawi duh chu. Kei chu ka chiang a, midang an 'chian' ve loh avang maia ka chian dan leh ngaihdana an kal ngei theihna atana barhluih ka tum chuan 'Democracy' thuthlung kalh a ni a. Chumi piah lamah chuan in tih luih hian thil ṭha lo leh a letling zawngin a kaltir zawk fo. Tam takin kan hre tawh lo mai thei. India rama hnam hrang hrang awmte an insuihkhawmna a ṭhat leh zual duhtute chuan Hindi chauh hi sorkar ṭawngah hman ni se tih an rawt a, mahse India rama Hindi hman duh lotute an sapatal ta a nih kha. Hindi barhluih hi an tipuitling ngam ta lo mai a ni lova, he thil hian India rama hnam hrang hrangte inpumkhatna lam aiin inṭhendarhna lam kawngah a thawk na zawk a ni. Hindi hi thiam vek ila chuan a ṭha alawm, keini Mizote tan pawh a ṭha ang. Mahse, hman luih tir min tum erawh chuan thih tha-in kan dodal ngei ang. A chhan chu kan hre vek.

Assam hnuaia kan awm lai pawh khan mi ṭhahnemngai zualte'n Assamese ṭawng chu sorkar ṭawngah leh zirna in zawng zawnga hman tura tihluih an tum ngawt mai a. Keini tiamin Assam hnuaia hnam hrang hrang awmte chu an hel ta luih luih mai a; Assamese ṭawng chu an hman tir thei lo mai ni lovin hill district leh district hrang hranga politician ṭangrualte chuan ṭan la-in Assam chu state tam takah sahthlak a lo ni ta a nih hi. Tuna Assam aṭanga indang ta state-te hi an indang vek tho mai thei a, mahse Assam sorkar leh hnam tam ber Assamese laka an hnam leh ṭawng himna a derthawnga hriatna lo piang nasa ta lutuk khan

Assam inpumkhatna chu a tichhe ta nghal a ni.

Lai leh Mara Autonomous District Council huam chhunga ding YMA branch te leh YLA leh MṬP te inkara harsatna a awm khan kan Central YMA hruaitute hian thil an tifuh tawh lo tih kan hre vek. Helaia awmte leh Hmar hnam pawlte chu an ṭangrual vat mai a nih kha. CYMA hruaitute duh fir lutuk, Mizo insuihkhawmna atana anmahni duhdan leh ngaihdan chauh an ngaihtuahna chuan nghawng ṭha lo satliah mai pYMA CHANGREL

A SUAL TA

FO MAI

awh ni lo, a letling zawngin hna a thawk ta a ni.

Hemi hnu hian Myanmar aṭanga Mizorama rawn awm kan Mizo puite an han bitum leh zui a. Tuna kan Central YMA hian a hming leh a innghahna thuthlungte kalh zawngin thil a ti ta zat zat mai a. Mizo hnam inpumkhatna atana thawh hlawk thei ber tur leh thawk tura ngaih, a hruaitute pawh inzawmkhawmna duhtu nia ngaih ni si khan an duh fir luatah an zir sual ta a, an chang rel a sual ta a ni.

Mizo hnam hrang hrangin puan hrang hrang mawi tak tak kan nei a, chu chu Mizo hnam chapona tling pha a ni a. Puanchei leh puanropui hi Mizo puan kan tih bik erawh chuan a fuh ngai lovang. Mizo hnam hrang hrangin ṭawng hrang an neihte pawh hi lo changtlung vek sela, kan ṭawng hman lar ber 'Mizo ṭawng' kan tih takah a rem dan dana seng luha tih hausakna'na hman tur a ni. English te pawh hi ṭawng dang an lakluh zel avanga ṭawng hausa lo ni ta a ni. Latin ṭawng thumal tawi te 'Tele' sawpṭawnga 'far', Mizo ṭawnga 'hla' (hnai lo) tihna thumal an seng luh avanga ṭawng thu lo piang tamzia hi kan ngaihtuah ngai em - Television, Telegraph, Telegram, Telephone, Telecommunication, Telepathy, Telemedicine te - a tam thei mai.

Mizo hnam hrang hrangte kan inpumkhatna tur chu Central YMA-in tunlaia an tih dan anga tihluihna rawngkai ni lovin Mahatma Gandhi-a sawi anga pangpar chi hrang hrang mawi taka indipdal lova an par ang tur hi a ni. Myanmar-a kan unaute hi an duh reng vanga awm an ni lova; British sorkarin India, Myanmar leh Bangladesh ramah te min ṭhendarh vang mai an ni.

Thil pawi em em chu Mizote'n YMA kan ngaihdan inthlak tur hi a ni. Kan pasalṭhate dinhmun rawn luah a khawtlang muantu ni ṭhin kha pawl ṭihbaiawm leh hlauhawm tak a lo ni ta. Mi tlemte kal vung leh firfiak vanga he pawl ropui tak, pawl hlauhawm tak, khaw engemawzat tiralṭi-tu a lo ni ta mai hi a pawi tih mai loh chu sawi ngaihna ka hre lo.

Ramdangmi hi dan kalha an awm a nih chuan an chunga hremna lektu tur chu sorkar a ni a, sorkar chuan hmanrua hlawh nei Police te a nei a. An chungchang rel saktu tur Court pawh a awm. Chutiang mite chu sorkarin a seng hawi ang. Chuti chung pawh chuan kan unau, kan Mizo puite ngei lakah chuan kan ngaihdan pawh a dang tur a ni dawn lo'm ni? Misual an awm chuan danin an chungah ro a rel ang a, danin man

thei tura thuneihna a pekte'n an man mai tur a ni. Khua hial inhalsak leh nunau pawh sawi lova inhnawhchhuah rum rum mai hi 'Kristian nundan ṭha' em ni dawn? Mi thinlunga hlauhna tuha Mizo leh Mizo inep tir vak mai hi em ni YMA tih tur? Zu zuar pawh MLTP Act, 1995 hmanga hrem tur an ni a, a man theitu chu Police leh Excise and Narcotics department mite an ni. He dan hian khua leh chenna in aṭanga inhnawhchhuah a keng tel lo. YMA te thuneihna a pe hek lo.

Sual kan haw tur a nih laiin sual leh sual anga lang zawng zawng tihbo vek hi buaithlak tak a ni. Kan duh tak tak a nih chuan Police State din ila crime chu a tlem khawp ang, mahse chu sorkar hnuaia awm chu a thaw-i-pik thlak khawp ang. Jail chhungah hian misual rual pawh khauh taka khuahkhirh an nih avangin suahsual bawlna lian tham a awm thei lo, mahse a nuam lo. Thil ṭha lo kan do a nih pawhin dan chhungah, dan rorelna zah chunga kan tih a ngai. Chumi a nih loh chuan khawtlang tinuamlotu leh dan bawhchhetu kan ni ang.

Central YMA hruaitute hi in ngaihtuah vang vang teh u. Ṭhanhnem in ngai a, in ngaih dan a dik lo thung. Nakinah hun a lokal ang a, YMA hming tichhetu, miin YMA an hmuh dan, pawl ṭha leh thianghlim a nihna tibawrhbangtu a an la puh hunah che u chuan he kan thu khel hi in la chhiar let leh dawn nia.

Source: Vanglaini, 19th August, 2013

__._,_.___