Aizawl:Mizo Students’ Union chuan Kolasib district, Saihapui V-a Assam sawrkarin school a din nia an sawi school education department-in minister hnena report a pek danah thil dik tawk lo a awm nia sawiin, he school chungchangah hian Mizoram sawrkar chuan hma la vat se an duh.
MSU hian Saihapui ‘V’ a Assam sawrkar enkawl Donakhal school hi Feb. 20, 2009 khan a hmunah kalchilhin an enfiah tawh niin an sawi a. Helai hi ramri, ram inchuh lai niin Donakhal school-ah hian Bengali medium zir a ni a, Mizo zirtirtu, Vanlalnghaka a awm a, a ni hian Assam sawrkar atangin hlawh a la a, amah chauh hi zirtirtu awmin a pension tep tawh nghe nghe a ni, an ti. He school-ah hian hnamdang zirlai naupang 30 chuang an awm mek a ni, an ti bawk.Hetihlai hian school education deptt. hotuten a hmuna kal SDEO report an tarlan danah chuan Donakhal school-ah hian zirtirtu 3/4 vel an awm a, an zingah hian Mizo pakhat a awm ve nia tarlangin, zirlai naupang 6/7 vel lek awmin, helai hmun hi Assam ramri chhunga ngaih thin a ni a, mahse tunah chuan school hi an rawn ngaihsak tha lo hle niin an sawi thung.
School education deptt. report-ah Assam sawrkarin he school hi enkawl tha vak tawh lo anga a tarlan lai hian a hmuna enfiahtu MSU chuan tunhnai mai khan a building pawh hi an rawn sa tha niin an sawi.
Department report dan chuan he khuaah hian SSA Mizoram-in school an din a, a khua naupangte pawh Mizoram enkawl primary school-ah hian an kal deuh vek a, Donakhal school hi tihtawp an duh hle thin a, mahse disputed area a nih anga engemaw hleka boruak sosang thut thei a nih avangin hma lak mai a rem thin lo niin a tarlang.
MSU chuan hemi chungchanga hma la tur hian home minister pawh an lo ngen tawh a, Saihapui V chu Mizoram chhung ngeia awm a nih dan te, electoral roll hluia awm mi 37 Assam sawrkar hnuaia awm tih loh chu Mizoram electoral roll-ah an hming a chuang vek tawh thu te, revenue pawh Mizoram sawrkarah chhungin ram pawh VC pass-na inpek chhuah a nih thu te an thlen a ni. (Courtesy Evening Post)